සතුට සපිරි විනෝද සැණකෙළිය ඔක්තෝබර්ෆෙස්ට්
October 2017

සාම්ප්‍රදායික ඩ්රින්ඩල් සහ ලේඩර්හෝසන් ඇඳුම්වලින් සැරසී සව්දි‍ය පිරීමට සූදානම්ව

ඒකාකාරීත්වයෙන් යුතු කාර්යබහුල ජීවන රටාවෙන් මදකට හෝ මිදෙන්න අපි කවුරුත් කැමතියි. ඒ අතර හිතේ හැටියට කාලා බීලා නටලා ගයලා විනෝද වෙන්න වසරකට වරක් හෝ අවස්ථාව ලැබෙනවා නම් එය කොයි තරම් නම් සුන්දර අත්දැකීමක් ජීවිතයට එක්කරාවිද? ඔක්තෝබර්ෆෙස්ට් යනු එවන් සොඳුරු අත්දැකීමක් එක් කළ හැකි වාර්ෂිකව පවතවනු ලබන සැණකෙළියකි.


සටහන: අනුරාධා පෙරේරා


ලොව විශාලතම බීර සැණකෙළිය ලෙසින් හැඳින්විය හැකි ඔක්තෝබර්ෆෙස්ට් හි නිජබිම වන්නේ බටහිර සහ මධ්‍යම යුරෝපා ප්‍රදේශය පුරාවට විහිදී තිබෙන සුන්දර ජර්මනියයි. විනෝදකාමී ජන කොට්ඨාසයක් වන ජර්මානු ජාතිකයින් උත්සවශ්‍රීයෙන් යුතුව වාර්ෂිකව මෙය සමරනු ලබයි. සැප්තැම්බර් මාසයේ අවසාන සතියේ සිට ඔක්තෝබර් මාසයේ පළමුවැනිදා හෝ දෙවැනිදා තෙක් වන දින දහයක් පමණ කාලය තුළ පවත්වනු ලබන ජන සැණකෙළියක් වන මෙම සැමරුම පුරාවට පවතින්නේ සතුට සහ විනෝදයයි. එහිදී සිදුවන්නේ කා බී නටා ගයා ප්‍රීති වීමයි.


ඔක්තෝබර්ෆෙස්ට් හී මූලිකත්වයක් ගන්නේ මාංශ ආහාර වර්ගයන් සහ ජර්මනියටම සුවිශේෂී පානයක් වන බීර ය. ඊට අමතරව විවිධාකාරයේ සොසෝජස් වර්ග, පොඩි කරගත් අර්තාපල්වලින් සකසනු ලබන ආහාර වර්ග මෙන්ම ඉඟුරු පාන් වැනි ආහාරයන්ද සුවිශේෂය.


ජර්මනියේ බවේනියාවේ මියුනිච් හි‍දී ඇරඹී මෙම සැණකෙළිය සඳහා සහභාගිවන පිරිස සූදානම් වන්නේ ජර්මානු සංස්කෘතියටම ආවේණික වූ සම්ප්‍ර‍දායානූකූල ජර්මානු ඇඳුම් පැළඳුම්වලිනි. අහසේ පැහැයන් වන නිල් සහ සුදු පැහැය මූලික කරගනිමින් සැරසීම මෙම සැමරුමෙහි වන සුවිශේෂීත්වයකි. එහිදී පුරුෂ පාර්ශ්වය දණහිස තෙක් දි‍ගු වූ කලිසම්, දිගු අත් සහිත කමිස, දණහිස් තෙක් දි‍ගු වු විසල් මේස් සහ සපත්තුවලින් සමන්විත ලේඩර්හෝසන් නම් සාම්ප්‍රදායික ඇඳුමින් සැරසෙයි. ස්ත්‍රී පාර්ශ්වය සැරසෙන්නේ කාන්තා සිරුරේ ලාලිත්‍යය මනාව ඔප්නංවන සාම්ප්‍රදායික ඩ්රින්ඩල් නම් වූ ගවුමෙනි. දෙදණ තෙක් දිගු පිබ්බුණු සායකින් සමන්විත වන එම ගවුම පුළුල් කරකින් සහ බෝරිච්චි ආකාරයේ කෙටි අත්වලින් සමන්විතය.

ජර්මනියට ආවේණික සැමරුමක් වුවත් අද වනවිට ඔක්තෝබර්ෆෙස්ට් යනු ලොව පුරා ප්‍රචලිතව ඇති ඉතාමත් උත්සවශ්‍රීයෙන් යුතුව සමරනු ලබන වාර්ෂික සැමරුමකි


විශාල ජන සංඛාවක සහභාගීත්වයෙන් පවත්වන ඔක්තෝබර්ෆෙස්ට් යනු මූලික වශයෙන් ආහාර පාන සැණකෙළියකි. දිගු මේස දෙපස අසුන් ගන්නා ස්ත්‍රී පුරුෂ දෙපාර්ශ්වයම සව්දි‍ය පුරමින්, උසුළු විසුළු කතාබහ මැද සැණකෙළිය අරඹන අතර, එය වඩාත් අලංකාරවත් වන්නේ එයට සැපයෙන සාම්ප්‍රදායික බටහිර තූර්ය භාණ්ඩයන්ගේ වාදයන්ගෙන් සුසරවන ජර්මානු ජන සංගීතයෙනි. ඒ කන්කලූ වූ සංගීතයට අනුව නර්තනයට ප්‍රවිෂ්ටවන පිරිමි පාර්ශ්වය සිය කකුලට සහ සපත්තුවලට රිද්මයානුකූලව තට්ටු කරමින් අපූරු ජර්මානු සම්ප්‍රදානුකූල ජන නර්තනයක යෙදෙන අතර කාන්තා පාර්ශ්වයද ඒත් සමඟින් නර්තනයට එකතු වන්නේ ඊට නොදෙවෙනි අලංකාරත්වයක් ගෙනදෙමිනි. එලෙසින් ගායනයේ සහ නර්තනයේ යෙදෙන අතරම විවිධාකාරයේ විනෝදජනක ක්‍රීඩාවලද යෙදෙන්නේ ප්‍රීති ප්‍රමෝදයෙන් යුතුවය.


ජර්මනියට ආවේණික සැමරුමක් වුවත් අද වනවිට ඔක්තෝබර්ෆෙස්ට් යනු ලොව පුරා ප්‍රචලිතව ඇති ඉතාමත් උත්සවශ්‍රීයෙන් යුතුව සමරනු ලබන වාර්ෂික සැමරුමක් බවට පත්ව ඇති අතර ඒ සදහා ලොව පුරා සිටින මිලියන හයකට අධික වූ ජන පිරිසක් වාර්ෂිකව සම්බන්ධ වෙයි. ශ්‍රී ලංකාවේද වාර්ෂිකව පවත්වනු ලබන මෙම සැණකෙළිය මෙයට වසර විසි පහකට පමණ පෙර මෙරටට හඳුන්වාදී තිබේ. ශ්‍රී ලාංකිකයින්ගේ මෙන්ම ජර්මානු ජාතිකයින් ඇතුළු විදේශිකයින්ගේද සහභාගීත්වයෙන් පවත්වනු ලබන මෙරට ඔක්තෝබර්ෆෙස්ට් සැණකෙළි ප්‍රධාන වශයෙන් පැවැත්වෙන්නේ කොළඹ නගරය ආශ්‍රිතවය.


වෙනසක් අවැසි ඔබේ දිවියට වෙනත් සංස්කෘතියක අපූර්වත්වය ගෙන ආ හැකි මෙවන් සොඳුරු සැමරුමක මිහිර විදීමට අවස්ථාවක් සැලසේ නම් එමගින් දි‍වියේ ඒකාකාරීත්වයෙන් මිදීමට අවස්ථාවක් සැලසෙනවා නොඅනුමානය.


මෙම ලිපිය සැකසෙන්නේ, ගල්කිස්ස මහා හෝටලයේ ආහාර පාන මෙහෙයුම් අධ්‍යක්ෂක රැල්ෆ් වොග් මහතා සහ ගල්කිස්ස මහා හෝටලයේ බටහිර ආහාර අංශයේ විධායක සූපවේදී මිකායෙල් ගර්ගලේ මහතා සමඟ පැවැත්වූ සාකච්ඡාවක් සහ එම හෝටලයෙන් සැපයූ ඡායාරූප ඇසුරිනි.


A German folk festival held globally, Oktoberfest is a chance to dance in merriment. It is an important Bavarian tradition celebrated since the early 1800s. Oktoberfest is also the world's largest beer festival. The festival, spanning at least ten days, usually commences during the last week of September and continues to the first week of October. The festival area is decorated in the traditional blue and white. Food, beverages and dance are a main part of the festivities. The Oktoberfest spread includes Bratwurst sausages, Sauerkraut (pickled cabbage), mashed potato and gingerbread hearts. Men and women wear traditional German attire, such as the lederhosen for males and dirndl for females.


Information provided by Ralf Vogt, Director Operations - Food & Beverage and Michael Goeggerle, Executive Chef - Western of Mount Lavinia Hotel.

  • image01
    image01

    දිගු මේසවලින් සමන්විත සැණකෙළි බිම

    Prev Next
  • image01
    image01

    සැණකෙළිය ඇරඹීමට සූදානම්ව

    Prev Next
  • image01
    image01

    නටා ගයා ප්‍රීතිවන මොහොතක්

    Prev Next