තුරඟ තරගය කලඑළිකරන විලාසිතා
April 2017

ඇඳුමේ අලංකාරත්වය වඩවන්නට හිස්වැස්මෙන් ලැබෙන සහයෝගය

ජීවිතය හරි අපූරුය. එය විවිධාකාරයේ අත්දැකීම් ලබාදෙන තෝතැන්නකි. බොහෝවිට ජීවිතයේ පළමුවරට යම් අත්දැකීමක් විඳීමට සූදානම් වන අවස්ථාවක චකිතයක් එසේත් නැතිනම් කුතුහලයක් උපදී. මෙම අවස්ථාවට මා සහභාගීවූයේද ඒ කුතුහලය පෙරදැරි කරගෙනමය. ඒ තුරඟ තරගයක් නැරඹීමට යාමේදී සූදානම් විය යුතු විලාසිතාව කෙලෙසින් විය යුතුද යන චකිතය නිසාය.


සටහන: අනුරාධා පෙරේරා | ඡායාරූප: Royal Turf Club


විවිධාකාරයේ උත්සව අවස්ථාවන්වලට, ක්‍රීඩා අවස්ථාවලට සහභාගිවී තිබුණද තුරඟ තගරයක් නරඹන්නට සූදානම් වූයේ පළමුවරටය. ඒ පිළිබඳව මා අසා දැනතිබූ ආකාරයට සූදානම් වුණෙමි. දණහිසින් තරමක් පහළට දික්වූ අලංකාර මල් මෝස්තරයක් මුද්‍රිත ගවුමකිනුත්, එයටම සරිලන පුළුල් වාටිය සහිත හිස්වැස්මකින් මෙන්ම එම ඇඳුමටම ගැලපෙන කුඩා අත් බෑගයකින්ද සැරසුනෙමි. සීත සුළං වැල් නිතර දඟකරන නුවරඑළියේ දේශගුණයට සරිලන්න අලංකාර සළුවකින්ද සැරසුනේ ඇඳුමේ අලංකාරය තවතවත් වැඩිකරමින්ය. විනිවිද පෙනෙන අලංකාර අත්වැසුම් සහ සමේ පැහැයෙන්වූ ස්ටොකින්ග්ස් නිසා අලංකාරයට අමතරව සිරුරට අවැසිවූ උෂ්ණත්වයද සම්පූර්ණ විය.


මා, විසල් තුරඟ තරග පිටිය වටා දෙනෙත් යොමු කළේ සිතේ ඇතිවූ චකිතය නිසාමය. එනම් එම අවස්ථාව සඳහා මා සැරසුණු ඇඳුම කෙතරම් දුරකට ගැලපේද යන බියමුසු කුතුහලයෙනි. මගේ මිතුරියගෙන් ලද තොරතුරු සත්‍යබව පසක්වූයේ ඒ වනවිටත් තුරඟ තරගය නැරඹීමේ අදහසින් සූදානම්ව සිටි පිරිස දැකීමෙනි. එහි පැමිණ සිටි කාන්තාවන්ගෙන් බොහෝදෙනෙකු සැරසී සිටියේ මා අයුරින්මය. එය මසිතට ගෙන ආවේ සැනසිල්ලකි. වෙනසකට වූයේ සමහරුන් ගවුම් වෙනුවට අලංකාර සාය සහ බ්ලවුස්වලින් සැරසී සිටීමය. ඒ අතර සිටි කිහිපදෙනෙක් දිගු කලිසම් සහ ෂර්ට්වලින් සැරසී සිටියේ එම අවස්ථාවටම උචිත වන අයුරිනි. පිරිස අතර සිය මිතුරියන් සමඟ සතුටු සාමිච්චියේ යෙදී සිටි කාත්තාවක වෙත මගේ නෙත් යොමුවිය. සුන්දර මල් එම්බ්‍රොයිඩර් කළ වර්ණවත් ගවුමකින් සැරසී සිටි ඇය කතා කරමින් සිටින විට ඇගේ අත වූ අවාන තාලයකට පැද්දිනි. දීප්තිමත් වර්ණයන්ගෙන් යුත් අලංකාර ඇඳුමින් සැරසී සිටි එම සියලූදෙනාම ශෝභමාන එහෙත් චාම් හිස් වැසුම්වලින් හෝ හිස් පළදනාවලින් සැරසී සිටිනු දැකිය හැකි විය.


තැන තැන හිඳ සිටි පිරිස අතරින් මගේ අසුන සොයා පිය එසවූයෙමි. තණ කොළ වැවූ තරමක් බුරුල් පස සහිත තුරඟ තරග පිටියේ ඇවිදීමට මා පැළද සිටි තරමක අඩිය සහිත වෙජ් පාවහන් ඉතාමත් හොඳින් ගැලපෙන බව පසක් විය. ධාවන මං තීරු පැහැදිළිව පෙනෙන ස්ථානයක අසුනක් සොයාගැනීම අපහසු නොවීය. එතැනට එම ධාවන මං තීරු පමණක් නොව පැමිණ සිටි නරඹන්නන් පිරිසද ඉතාමත් හොඳින් පෙනුනි. තරමක් වෙනස් ආකාරයේ අත්දැකීමක් වූ බැවින් එම සොඳුරු විලාසිතාවන්ගේ හැඩයන් දෙනෙතින් උකහාගන්නට මගේ සිත පෙරළි කළේය. එම විලාසිතාවන් අතර හිත ගැටුණු මුල්ම සුවිශේෂීත්වය වූයේ තුරඟ තරග යනු ක්‍රීඩා අවස්ථාවක් වුවත් එය නැරඹීම සඳහා පැමිණ සිටි කිසිවෙකු ක්‍රීඩා ඇඳුම්වලින් සූදානම් වී නොසිටීමය. එම පිරිසගෙන් දක්නට ලැබුනේද චාම් එහෙත් අලංකාරත්වයෙන් සපිරුණු විලාසිතාවන්ය.


ස්ත්‍රී පාර්ශ්වයෙන් පමණක් නොව පුරුෂ පාර්ශ්වයෙන්ද දක්නට ලැබුණේ ඊට නොදෙවෙනි විලාසිතාවන්ය. ඒ අතර සිය පෞරුෂත්වය මනාව දිස්වන ආකාරයේ කෝට් එක සහිත ෆුල් සූට්වලින් සැරසී සිටි මහත්වරුන් මෙන්ම අලංකාර මෙන්ම වර්ණවත් කමිස සහ කලිසම්වලින් සැරසී සිටි මහත්වරුන්ගෙන්ද දිස්වූයේ චාම් එහෙත් කඩවසම් බවකි. එපමණක්ද නොව සමහරුන් පැළඳ සිටි හිස්වැසුම් සහ අත රැඳි බස්තම් ඔවුන් වෙත තේජස්භාවයක් ගෙනදුනි. එලෙසින් සැරසුණු පිරිස අතර සමාජයේ විවිධ තරාතිරම්වල පුද්ගලයින් පමණක් නොව විදේශිකයින්ද දක්නට ලැබුණි. එම විදේශිකයන් නෙත ගැටීමත් සමඟින් මගේ සිත දිව ගියේ මෙරට බ්‍රිතාන්‍ය පාලනය පැවති කාලයටය. මෙරටට තුරඟ තරග සහ විලාසිතාවන් හඳුන්වාදුන් ඒ කාලයේදීද මෙලෙසින්ම හැඩවැඩවුණු පිරිස් එකතුවී තුරඟ තරග නරඹන්නට ඇතැයි මට සිතුනි.


රජවරුන්ගේ ක්‍රීඩාව ලෙසින් හඳුන්වනු ලබන තුරඟ තරගය ආරම්භ විය. රැස්ව සිටි ස්ත්‍රී, පුරුෂ, බාල, මහලූ සියලූ දෙනාගේම අවධානය ඒ වෙත යොමුවිය. සිය දෙමව්පියන් සමඟ තරගය නැරඹීමට පැමිණ සිටි කුඩා දූ දරුවන්ගෙන්ද දක්නට ලැබුණේ ක්‍රීඩාශීලී උද්‍යෝගයකි. පවනක් බඳු වේගයෙන් දිව යන තුරඟයින් සහ ජවයින් සපිරි මුහුණින් යුතුව තුරඟයින් මෙහෙවූ අසරුවන් සියලූදෙනාගේ අවධානය සිය අණසකට යටත් කරගැනීමට සමත් විය. ආරම්භයේ සිටම හොඳ පරතරයක් තබාගත් තුරඟයා සහ අසරුවා ජයග්‍රහණයේ කිරුළ තමන් සතු කරගත්තේ නරඹන්නන් සියලූදෙනාගේම ඔල්වරසන් හඬ මධ්‍යයේය.


ජයග්‍රාහකයින්ගේ සම්මාන ප්‍රදානෝත්සවයෙන් අනතුරුව ඇරඹියේ සොඳුරු තේ සාදයයි. එහිදී මිහිරි ආහාරයන්ගේ රසය බලන අතරතුර ෂැම්පේන්, තේ සහ කොක්ටේල් වැනි පානයන් අතරින් රුචිකත්වය අනුව කැමති පානය රසවිඳිනු ලැබුවේ පැමිණ සිටි පිරිස සමඟ සුහද පිළිසඳරකද යෙදෙමිනි. නුවරඑළියට සංචාරකයින් බහුලව පැමිණෙන මෙම කාලසීමාවේ පමණක් නොව සෑම මසකම මෙලෙසින් තුරඟ තරග සංවිධානය වන බවත් පිරිස මෙලෙසින් පැමිණ සතුටු වන බවත් එම පිළිසඳරේදී දැනගන්නට ලැබුණි. එලෙසින් පුරා හෝරා කිහිපයක් පුරාවට පැවති එම සොඳුරු අවස්ථාවෙන් නික්මුනේ ජීවිත පොතට අමතක නොවන සුමිහිරි මතකයන් ගොන්නක් එක්කරමින්ය.


සුන්දර නුවරඑළියේදී මා අත්විඳි ඒ සොඳුරු අත්දැකීම ඔබටත් අත්විඳින්න්ට ලැබුණහොත් එය ඔබගේ ජීවියටත් සොඳුරු සැමරුමක් වනු නොඅනුමානනය. ඔබේ ආදරණීයයන් සමඟින් නුවරඑළියේ සංචාරයක යෙදීමට බලාපොරොත්තුවෙන් සිටිනවා නම් මේ සොඳුරු අවස්ථාවත් එයට එක් කරගැනීමට ඔබට හැකියාව ඇත.


නුවරඑළියේ රෝයල් ටර්ෆ් ක්ලබ් හි පැවැත්වෙන තුරඟ තරග ආශ්‍රිත විලාසිතාවන් ඇසුරින් මෙම ලිපිය සැකසුනි.


Racing fashions were born in the UK, where the royalty and the nobility dressed exquisitely to socialize at "the sport of kings". In this article the writer recounts her experience of fashion at the Royal Turf Club, Nuwara Eliya.


She notes that floral gowns were the order of the day, though there were women in skirts and blouses and also a scattering of ladies in (dressy) trousers. All the ladies wore hats or trendy fascinators.The men too have to be equally well dressed at this occasion.


The article captures the ambience of a day at the races in Nuwara Eliya.'

  • image01
    image01

    හැඩැති මල් මුද්‍රිත ගවුමටම සරිලන හිස්වැස්ම

    Prev Next
  • image01
    image01

    අලංකාර ගවුම, එයටම සරිලන හිස්වැස්ම සහ පාවහන්

    Prev Next
  • image01
    image01

    ශෝභමාන පෙනුමෙන්යුත් චාම් එහෙත් අලංකාර හිස් සැරසිල්ලක්

    Prev Next
  • image01
    image01

    දීප්තිමත් වර්ණයන්ගෙන් සැරසී

    Prev Next